ಶ್ರೀ ಸೂರ್ಯ ಪ್ರಾತಃ ಸ್ಮರಣ ಸ್ತೋತ್ರಂ

ಪ್ರಾತಃ ಸ್ಮರಾಮಿ ಖಲು ತತ್ಸವಿತುರ್ವರೇಣ್ಯಂ

ರೂಪಂ ಹಿ ಮಂಡಲಮೃಚೋಽಥ ತನುರ್ಯಜೂಂಷಿ |

ಸಾಮಾನಿ ಯಸ್ಯ ಕಿರಣಾಃ ಪ್ರಭವಾದಿಹೇತುಂ

ಬ್ರಹ್ಮಾಹರಾತ್ಮಕಮಲಕ್ಷ್ಯಮಚಿಂತ್ಯರೂಪಮ್ || ೧ ||

ಪ್ರಾತರ್ನಮಾಮಿ ತರಣಿಂ ತನುವಾಙ್ಮನೋಭಿ-

-ರ್ಬ್ರಹ್ಮೇಂದ್ರಪೂರ್ವಕಸುರೈರ್ನತಮರ್ಚಿತಂ ಚ |

ವೃಷ್ಟಿಪ್ರಮೋಚನವಿನಿಗ್ರಹಹೇತುಭೂತಂ

ತ್ರೈಲೋಕ್ಯಪಾಲನಪರಂ ತ್ರಿಗುಣಾತ್ಮಕಂ ಚ || ೨ ||

ಪ್ರಾತರ್ಭಜಾಮಿ ಸವಿತಾರಮನಂತಶಕ್ತಿಂ

ಪಾಪೌಘಶತ್ರುಭಯರೋಗಹರಂ ಪರಂ ಚ |

ತಂ ಸರ್ವಲೋಕಕಲನಾತ್ಮಕಕಾಲಮೂರ್ತಿಂ

ಗೋಕಂಠಬಂಧನವಿಮೋಚನಮಾದಿದೇವಮ್ || ೩ ||

ಶ್ಲೋಕತ್ರಯಮಿದಂ ಭಾನೋಃ ಪ್ರಾತಃ ಪ್ರಾತಃ ಪಠೇತ್ತು ಯಃ |

ಸ ಸರ್ವವ್ಯಾಧಿನಿರ್ಮುಕ್ತಃ ಪರಂ ಸುಖಮವಾಪ್ನುಯಾತ್ || ೪ ||