ಶ್ರೀ ದತ್ತ ನಕ್ಷತ್ರಮಾಲಿಕಾ ಸ್ತೋತ್ರಂ

ಗೋದಾವರ್ಯಾ ಮಹಾನದ್ಯಾ ಉತ್ತರೇ ಸಿಂಹಪರ್ವತೇ |

ಸುಪುಣ್ಯೇ ಮಾಹುರಪುರೇ ಸರ್ವತೀರ್ಥಸಮನ್ವಿತೇ || ೧ ||

ಜಜ್ಞೇಽತ್ರೇರನಸೂಯಾಯಾಂ ಪ್ರದೋಷೇ ಬುಧವಾಸರೇ |

ಮಾರ್ಗಶೀರ್ಷ್ಯಾಂ ಮಹಾಯೋಗೀ ದತ್ತಾತ್ರೇಯೋ ದಿಗಂಬರಃ || ೨ ||

ಮಾಲಾಂ ಕುಂಡೀಂ ಚ ಡಮರುಂ ಶೂಲಂ ಶಂಖಂ ಸುದರ್ಶನಮ್ |

ದಧಾನಃ ಷಡ್ಭುಜೈಸ್ತ್ರ್ಯಾತ್ಮಾ ಯೋಗಮಾರ್ಗಪ್ರವರ್ತಕಃ || ೩ ||

ಭಸ್ಮೋದ್ಧೂಲಿತಸರ್ವಾಂಗೋ ಜಟಾಜೂಟವಿರಾಜಿತಃ |

ರುದ್ರಾಕ್ಷಭೂಷಿತತನುಃ ಶಾಂಭವೀಮುದ್ರಯಾ ಯುತಃ || ೪ ||

ಭಕ್ತಾನುಗ್ರಹಕೃಂನಿತ್ಯಂ ಪಾಪತಾಪಾರ್ತಿಭಂಜನಃ |

ಬಾಲೋನ್ಮತ್ತಪಿಶಾಚಾಭಃ ಸ್ಮರ್ತೃಗಾಮೀ ದಯಾನಿಧಿಃ || ೫ ||

ಯಸ್ಯಾಸ್ತಿ ಮಾಹುರೇ ನಿದ್ರಾ ನಿವಾಸಃ ಸಿಂಹಪರ್ವತೇ |

ಪ್ರಾತಃ ಸ್ನಾನಂ ಚ ಗಂಗಾಯಾಂ ಧ್ಯಾನಂ ಗಂಧರ್ವಪತ್ತನೇ || ೬ ||

ಕುರುಕ್ಷೇತ್ರೇ ಚಾಚಮನಂ ಧೂತಪಾಪೇಶ್ವರೇ ತಥಾ |

ವಿಭೂತಿಧಾರಣಂ ಪ್ರಾತಃಸಂಧ್ಯಾ ಚ ಕರಹಾಟಕೇ || ೭ ||

ಕೋಲಾಪುರೇಽಸ್ಯ ಭಿಕ್ಷಾ ಚ ಪಾಂಚಾಲೇಽಪಿ ಚ ಭೋಜನಮ್ |

ದಿನಗೋ ವಿಠ್ಠಲಪುರೇ ತುಂಗಾಪಾನಂ ದಿನೇ ದಿನೇ || ೮ ||

ಪುರಾಣಶ್ರವಣಂ ಯಸ್ಯ ನರನಾರಾಯಣಾಶ್ರಮೇ |

ವಿಶ್ರಾಮೋ ಸರದೇ ಸಾಯಂಸಂಧ್ಯಾ ಪಶ್ಚಿಮಸಾಗರೇ || ೯ ||

ಕಾರ್ತವೀರ್ಯಾರ್ಜುನಾಯಾದಾದ್ಯೋಗರ್ಧಿಮುಭಯೀಂ ಪ್ರಭುಃ |

ಸ್ವಾತ್ಮತತ್ತ್ವಂ ಚ ಯದವೇ ಬಹುಗುರ್ವಾಪ್ತಮುತ್ತಮಮ್ || ೧೦ ||

ಆನ್ವೀಕ್ಷಿಕೀಮಲರ್ಕಾಯ ಪ್ರಹ್ಲಾದಾಯ ತಗೀಯತೇ |

ಆಯೂರಾಜಾಯ ಚ ವರಾನ್ ಸಾಧ್ಯೇಭ್ಯೋ ಮೋಕ್ಷಸಾಧನಮ್ || ೧೧ ||

ಮಂತ್ರಾಂಶ್ಚ ವಿಷ್ಣುದತ್ತಾಯ ಸೋಮಕಾಂತಾಯ ಕರ್ಮ ಚ |

ಸ ಏವಾವಿರಭೂದ್ಭೂಯಃ ಪೂರ್ವಾರ್ಣವಸಮೀಪತಃ || ೧೨ ||

ಭಾದ್ರೇ ಮಾಸಿ ಸಿತೇ ಪಕ್ಷೇ ಚತುರ್ಥ್ಯಾಂ ರಾಜವಿಪ್ರತಃ |

ಸುಮತ್ಯಾಂ ಪ್ರಾಕ್ಸಿಂಧುತೀರೇ ರಮ್ಯೇ ಪೀಠಾಪುರೇ ವರೇ || ೧೩ ||

ಯ ಆಚಾರವ್ಯವಹೃತಿಪ್ರಾಯಶ್ಚಿತ್ತೋಪದೇಶಕೃತ |

ನಿಜಾಗ್ರಜಾವಂಧಪಂಗೂ ವಿಲೋಕ್ಯ ಪ್ರವ್ರಜನ್ ಸುಧೀಃ || ೧೪ ||

ಮಾತಾಪಿತ್ರೋರ್ಮುದೇ ದೃಷ್ಟಿಂ ಗತಿಂ ತಾಭ್ಯಾಮುಪಾನಯತ್ |

ಮಹೀಂ ಪ್ರದಕ್ಷಿಣೀಕೃತ್ಯ ಗೋಕರ್ಣೇ ತ್ರ್ಯಬ್ದಮಾವಸನ್ || ೧೫ ||

ತತಃ ಕೃಷ್ಣಾತಟಂ ಪ್ರಾಪ್ಯ ಮರ್ತುಕಾಮಾಂ ಸಪುತ್ರಕಾಮ್ |

ನಿವರ್ತ್ಯ ಬ್ರಾಹ್ಮಣೀಂ ಮಂದಂ ಪ್ರದೋಷಂ ವ್ರತಮಾದಿಶತ್ || ೧೬ ||

ತತ್ಪುತ್ರಂ ವಿಬುಧಂ ಕೃತ್ವಾ ತಸ್ಯಾ ಜನ್ಮಾಂತರೇ ಪ್ರಭುಃ |

ಪುತ್ರೋ ಭೂತ್ವಾ ನರಹರಿನಾಮಕೋ ದೇಶ ಉತ್ತರೇ || ೧೭ ||

ಕಾಂಚನೇ ನಗರೇಽಪ್ಯಂಬಾಮಾನಯದ್ವಿಪದೋ ವಿಭುಃ |

ಮಾಸಿ ಪೌಷೇ ಸಿತೇ ಪಕ್ಷೇ ದ್ವಿತೀಯಾಯಾಂ ಶನೇರ್ದಿನೇ || ೧೮ ||

ಜಾತಮಾತ್ರೋಽಪಿ ಚೋಂಕಾರಂ ಪಪಾಠಾಥಾಪಿ ಮೂಕವತ್ |

ಸಪ್ತಾಬ್ದಾನ್ ಲೀಲಯಾ ಸ್ಥಿತ್ವಾ ನಾನಾಕೌತುಕಕೃತ ಪ್ರಭುಃ || ೧೯ ||

ಉಪನೀತೋಽಪಠದ್ವೇದಾನ್ ಸಪ್ತಮೇ ವತ್ಸರೇ ಸ್ವಯಮ್ |

ಆಶ್ವಾಸ್ಯ ಜನನೀಂ ಪುತ್ರದ್ವಯದಾನೇನ ಬೋಧತಃ || ೨೦ ||

ಕಾಶೀಂ ಗತ್ವಾಽಷ್ಟಾಂಗಯೋಗಾಭ್ಯಾಸೀ ಕೃಷ್ಣಸರಸ್ವತೀಮ್ |

ಕೃತ್ವಾ ಗುರುಂ ಯತಿರ್ಭೂತ್ವಾ ವೇದಾರ್ಥಾನ್ ಸಂಪ್ರಕಾಶ್ಯ ಚ || ೨೧ ||

ಲುಪ್ತಸಂನ್ಯಾಸಿಧರ್ಮಂ ಚ ತೇನೇ ತುರ್ಯಾಶ್ರಮಂ ಭುವಿ |

ಮೇರುಂ ಪ್ರದಕ್ಷಿಣೀಕೃತ್ಯ ಶಿಷ್ಯಾನ್ ಕೃತ್ವಾಽಪಿ ಭೂರಿಶಃ || ೨೨ ||

ಪಿತೃಭ್ಯಾಂ ದರ್ಶನಂ ದತ್ವಾ ದ್ವಿಜಂ ಶೂಲರುಜಾರ್ದಿತಮ್ |

ಕೃತ್ವಾಽನಾಮಯಮಾಶ್ವಾಸ್ಯ ಸಾಯನ್ ದೇವಂ ಮಹಾಮತಿಮ್ || ೨೩ ||

ಅಬ್ದಂ ಸ್ಥಿತ್ವಾ ವೈದ್ಯನಾಥಕ್ಷೇತ್ರೇ ಕೃಷ್ಣಾತಟತೇ ತತಃ |

ಭಿಲ್ಲವಾಟ್ಯಾಂ ಚತುರ್ಮಾಸಾನ್ ವಿಭುರ್ಗತ್ವಾ ತತೋಽಗ್ರತಃ || ೨೪ ||

ನೃಸಿಂಹವಾಟಿಕಾಕ್ಷೇತ್ರೇ ದ್ವಾದಶಾಬ್ದಾನ್ ವಸನ್ ಸುಧೀಃ |

ತತ್ರ ಸ್ಥಿತ್ವಾಽಪಿ ಗಂಧರ್ವಪುರಮೇತ್ಯಾವಸನ್ ಮಠೇ || ೨೫ ||

ಜೀವಯಿತ್ವಾ ಮೃತಾನ್ ದುಗ್ಧ್ವಾ ವಂಧ್ಯಾಂ ಚ ಮಹಿಷೀಂ ಹರಿಃ |

ವಿಶ್ವರೂಪಂ ದರ್ಶಯಿತ್ವಾ ಯತಯೇ ವಿಶ್ವನಾಟಕಃ || ೨೬ ||

ಬಹ್ವೀರಮಾನುಷೀರ್ಲೀಲಾಃ ಕೃತ್ವಾ ಗುಪ್ತೋಽಪಿ ತತ್ರ ಚ |

ಯ ಆಸ್ತೇ ಭಗವಾನ್ ದತ್ತಃ ಸೋಽಸ್ಮಾನ್ ರಕ್ಷತು ಸರ್ವದಾ || ೨೭ ||

ಯಾ ಸಪ್ತವಿಂಶತಿಶ್ಲೋಕೈಃ ಕೃತಾ ನಕ್ಷತ್ರಮಾಲಿಕಾ |

ತದ್ಭಕ್ತೇಭ್ಯೋಽರ್ಪಿತಾ ಭಕ್ತಾಭಿಂನಶ್ರೀದತ್ತತುಷ್ಟಯೇ || ೨೮ ||

ದ್ವಾದಶ್ಯಾಮಾಶ್ವಿನೇ ಕೃಷ್ಣೇ ಶ್ರೀಪಾದಸ್ಯೋತ್ಸವೋ ಮಹಾನ್ |

ಮಾಘೇ ಕೃಷ್ಣೇ ಪ್ರತಿಪದಿ ನರಸಿಂಹಪ್ರಭೋಸ್ತಥಾ || ೨೯ ||