೩

ಧ್ಯಾನಮ್ –

ಶ್ವೇತಾಂಬರೋಜ್ಜ್ವಲತನುಂ ಸಿತಮಾಲ್ಯಗಂಧಂ

ಶ್ವೇತಾಶ್ವಯುಕ್ತರಥಗಂ ಸುರಸೇವಿತಾಂಘ್ರಿಮ್ |

ದೋರ್ಭ್ಯಾಂ ಧೃತಾಭಯಗದಂ ವರದಂ ಸುಧಾಂಶುಂ

ಶ್ರೀವತ್ಸಮೌಕ್ತಿಕಧರಂ ಪ್ರಣಮಾಮಿ ಚಂದ್ರಮ್ || ೧ ||

ಆಗ್ನೇಯಭಾಗೇ ಸರಥೋ ದಶಾಶ್ವ-

-ಶ್ಚಾತ್ರೇಯಜೋ ಯಾಮುನದೇಶಜಶ್ಚ |

ಪ್ರತ್ಯಙ್ಮುಖಸ್ಥಶ್ಚತುರಶ್ರಪೀಠೇ

ಗದಾಧರೋ ನೋಽವತು ರೋಹಿಣೀಶಃ || ೨ ||

ಅಥ ಸ್ತೋತ್ರಮ್ –

ಚಂದ್ರಂ ನಮಾಮಿ ವರದಂ ಶಂಕರಸ್ಯ ವಿಭೂಷಣಮ್ |

ಕಳಾನಿಧಿಂ ಕಾಂತಿರೂಪಂ ಕೇಯೂರಮಕುಟೋಜ್ವಲಮ್ || ೩ ||

ವರದಂ ವಂದ್ಯಚರಣಂ ವಾಸುದೇವಸ್ಯ ಲೋಚನಮ್ |

ವಸುಧಾಹ್ಲಾದನಕರಂ ವಿಧುಂ ತಂ ಪ್ರಣಮಾಮ್ಯಹಮ್ || ೪ ||

ಶ್ವೇತಮಾಲ್ಯಾಂಬರಧರಂ ಶ್ವೇತಗಂಧಾನುಲೇಪನಮ್ |

ಶ್ವೇತಚ್ಛತ್ರೋಲ್ಲಸನ್ಮೌಳಿಂ ಶಶಿನಂ ಪ್ರಣಮಾಮ್ಯಹಮ್ || ೫ ||

ಸರ್ವಂ ಜಗಜ್ಜೀವಯಸಿ ಸುಧಾರಸಮಯೈಃ ಕರೈಃ |

ಸೋಮ ದೇಹಿ ಮಮಾರೋಗ್ಯಂ ಸುಧಾಪೂರಿತಮಂಡಲಮ್ || ೬ ||

ರಾಜಾ ತ್ವಂ ಬ್ರಾಹ್ಮಣಾನಾಂ ಚ ರಮಾಯಾ ಅಪಿ ಸೋದರಃ |

ರಾಜಾ ನಾಥಶ್ಚೌಷಧೀನಾಂ ರಕ್ಷ ಮಾಂ ರಜನೀಕರ || ೭ ||

ಶಂಕರಸ್ಯ ಶಿರೋರತ್ನಂ ಶಾರ್ಙ್ಗಿಣಶ್ಚ ವಿಲೋಚನಮ್ |

ತಾರಕಾಣಾಮಧೀಶಸ್ತ್ವಂ ತಾರಯಾಽಸ್ಮಾನ್ಮಹಾಪದಃ || ೮ ||

ಕಲ್ಯಾಣಮೂರ್ತೇ ವರದ ಕರುಣಾರಸವಾರಿಧೇ |

ಕಲಶೋದಧಿಸಂಜಾತಕಲಾನಾಥ ಕೃಪಾಂ ಕುರು || ೯ ||

ಕ್ಷೀರಾರ್ಣವಸಮುದ್ಭೂತ ಚಿಂತಾಮಣಿಸಹೋದ್ಭವ |

ಕಾಮಿತಾರ್ಥಾನ್ ಪ್ರದೇಹಿ ತ್ವಂ ಕಲ್ಪದ್ರುಮಸಹೋದರ || ೧೦ ||

ಶ್ವೇತಾಂಬರಃ ಶ್ವೇತವಿಭೂಷಣಾಢ್ಯೋ

ಗದಾಧರಃ ಶ್ವೇತರುಚಿರ್ದ್ವಿಬಾಹುಃ |

ಚಂದ್ರಃ ಸುಧಾತ್ಮಾ ವರದಃ ಕಿರೀಟೀ

ಶ್ರೇಯಾಂಸಿ ಮಹ್ಯಂ ಪ್ರದದಾತು ದೇವಃ || ೧೧ ||

ಇದಂ ನಿಶಾಕರಸ್ತೋತ್ರಂ ಯಃ ಪಠೇತ್ ಪ್ರತ್ಯಹಂ ನರಃ |

ಉಪದ್ರವಾತ್ ಸ ಮುಚ್ಯೇತ ನಾತ್ರ ಕಾರ್ಯಾ ವಿಚಾರಣಾ || ೧೨ ||