ಪಂಚಬ್ರಹ್ಮೋಪನಿಷತ್

ಓಂ ಸಹ ನಾವವತು |

ಸಹ ನೌ ಭುನಕ್ತು

ಅಥ ಪೈಪ್ಪಲಾದೋ ಭಗವಾನ್ ಭೋ ಕಿಮಾದೌ ಕಿಂ ಜಾತಮಿತಿ |

ಸದ್ಯೋ ಜಾತಮಿತಿ |

ಕಿಂ ಭಗವ ಇತಿ |

ಅಘೋರ ಇತಿ |

ಕಿಂ ಭಗವ ಇತಿ |

ವಾಮದೇವ ಇತಿ |

ಕಿಂ ವಾ ಪುನರಿಮೇ ಭಗವ ಇತಿ |

ತತ್ಪುರುಷ ಇತಿ |

ಕಿಂ ವಾ ಪುನರಿಮೇ ಭಗವ ಇತಿ |

ಸರ್ವೇಷಾಂ ದಿವ್ಯಾನಾಂ ಪ್ರೇರಯಿತಾ ಈಶಾನ ಇತಿ |

ಈಶಾನೋ ಭೂತಭವ್ಯಸ್ಯ ಸರ್ವೇಷಾಂ ದೇವಯೋನಿನಾಮ್ || ೧ ||

ಕತಿ ವರ್ಣಾಃ |

ಕತಿ ಭೇದಾಃ |

ಕತಿ ಶಕ್ತಯಃ |

ಯತ್ಸರ್ವಂ ತದ್ಗುಹ್ಯಮ್ || ೨ ||

ತಸ್ಮೈ ನಮೋ ಮಹಾದೇವಾಯ ಮಹಾರುದ್ರಾಯ || ೩ ||

ಪ್ರೋವಾಚ ತಸ್ಮೈ ಭಗವಾನ್ಮಹೇಶಃ || ೪ ||

ಗೋಪ್ಯಾದ್ಗೋಪ್ಯತರಂ ಲೋಕೇ ಯದ್ಯಸ್ತಿ ಶೃಣು ಶಾಕಲ |

ಸದ್ಯೋಜಾತಂ ಮಹೀ ಪೂಷಾ ರಮಾ ಬ್ರಹ್ಮಾ ತ್ರಿವೃತ್ ಸ್ವರಃ || ೫ ||

ಋಗ್ವೇದೋ ಗಾರ್ಹಪತ್ಯಂ ಚ ಮಂತ್ರಾಃ ಸಪ್ತ ಸ್ವರಾಸ್ತಥಾ |

ವರ್ಣಂ ಪೀತಂ ಕ್ರಿಯಾ ಶಕ್ತಿಃ ಸರ್ವಾಭೀಷ್ಟಫಲಪ್ರದಮ್ || ೬ ||

ಅಘೋರಂ ಸಲಿಲಂ ಚಂದ್ರಂ ಗೌರೀ ವೇದದ್ವಿತೀಯಕಮ್ |

ನೀರದಾಭಂ ಸ್ವರಂ ಸಾಂದ್ರಂ ದಕ್ಷಿನಾಗ್ನಿರುದಾಹೃತಮ್ || ೭ ||

ಪಞ್ಚಾಶದ್ವರ್ಣಸಂಯುಕ್ತಂ ಸ್ಥಿತಿರಿಚ್ಛಾಕ್ರಿಯಾನ್ವಿತಮ್ |

ಶಕ್ತಿರಕ್ಷಣಸಂಯುಕ್ತಂ ಸರ್ವಾಘೌಘವಿನಾಶನಮ್ || ೮ ||

ಸರ್ವದುಷ್ಟಪ್ರಶಮನಂ ಸರ್ವೈಶ್ವರ್ಯಫಲಪ್ರದಮ್ || ೯ ||

ವಾಮದೇವಂ ಮಹಾಬೋಧದಾಯಕಂ ಪಾವಕಾತ್ಮಕಮ್ |

ವಿದ್ಯಾಲೋಕಸಮಾಯುಕ್ತಂ ಭಾನುಕೋಟಿಸಮಪ್ರಭಮ್ || ೧೦ ||

ಪ್ರಸಂನಂ ಸಾಮವೇದಾಖ್ಯಂ ಗಾನಾಷ್ಟಕಸಮನ್ವಿತಮ್ |

ಧೀರಸ್ವರಮಧೀನಂ ಚಾಹವನೀಯಮನುತ್ತಮಮ್ || ೧೧ ||

ಜ್ಞಾನಸಂಹಾರಸಂಯುಕ್ತಂ ಶಕ್ತಿದ್ವಯಸಮನ್ವಿತಮ್ |

ವರ್ಣಂ ಶುಕ್ಲಂ ತಮೋಮಿಶ್ರಂ ಪೂರ್ಣಬೋಧಕರಂ ಸ್ವಯಮ್ || ೧೨ ||

ಧಾಮತ್ರಯನಿಯಂತಾರಂ ಧಾಮತ್ರಯಸಮನ್ವಿತಮ್ |

ಸರ್ವಸೌಭಾಗ್ಯದಂ ನೄಣಾಂ ಸರ್ವಕರ್ಮಫಲಪ್ರದಮ್ || ೧೩ ||

ಅಷ್ಟಾಕ್ಷರಸಮಾಯುಕ್ತಮಷ್ಟಪತ್ರಾಂತರಸ್ಥಿತಮ್ || ೧೪ ||

ಯತ್ತತ್ತತ್ಪುರುಷಂ ಪ್ರೋಕ್ತಂ ವಾಯುಮಂಡಲಸಂವೃತಮ್ |

ಪಞ್ಚಾಗ್ನಿನಾ ಸಮಾಯುಕ್ತಂ ಮಂತ್ರಶಕ್ತಿನಿಯಾಮಕಮ್ || ೧೫ ||

ಪಞ್ಚಾಶತ್ಸ್ವರವರ್ಣಾಖ್ಯಮಥರ್ವವೇದಸ್ವರೂಪಕಮ್ |

ಕೋಟಿಕೋಟಿಗಣಾಧ್ಯಕ್ಷಂ ಬ್ರಹ್ಮಾಂಡಾಖಂಡವಿಗ್ರಹಮ್ || ೧೬ ||

ವರ್ಣಂ ರಕ್ತಂ ಕಾಮದಂ ಚ ಸರ್ವಾಧಿವ್ಯಾಧಿಭೇಷಜಮ್ |

ಸೃಷ್ಟಿಸ್ಥಿತಿಲಯಾದೀನಾಂ ಕಾರಣಂ ಸರ್ವಶಕ್ತಿಧೃಕ್ || ೧೭ ||

ಅವಸ್ಥಾತ್ರಿತಯಾತೀತಂ ತುರೀಯಂ ಬ್ರಹ್ಮಸಂಜ್ಞಿತಮ್ |

ಬ್ರಹ್ಮವಿಷ್ಣ್ವಾದಿಭಿಃ ಸೇವ್ಯಂ ಸರ್ವೇಷಾಂ ಜನಕಂ ಪರಮ್ || ೧೮ ||

ಈಶಾನಂ ಪರಮಂ ವಿದ್ಯಾತ್ ಪ್ರೇರಕಂ ಬುದ್ಧಿಸಾಕ್ಷಿಣಮ್ |

ಆಕಾಶಾತ್ಮಕಮವ್ಯಕ್ತಮೋಂಕಾರಸ್ವರಭೂಷಿತಮ್ || ೧೯ ||

ಸರ್ವದೇವಮಯಂ ಶಾಂತಂ ಶಾಂತ್ಯತೀತಂ ಸ್ವರಾದ್ಬಹಿಃ |

ಅಕಾರಾದಿಸ್ವರಾಧ್ಯಕ್ಷಮಾಕಾಶಮಯವಿಗ್ರಹಮ್ || ೨೦ ||

ಪಞ್ಚಕೃತ್ಯನಿಯಂತಾರಂ ಪಞ್ಚಬ್ರಹ್ಮಾತ್ಮಕಂ ಬೃಹತ್ || ೨೧ ||

ಪಞ್ಚಬ್ರಹ್ಮೋಪಸಂಹಾರಂ ಕೃತ್ವಾ ಸ್ವಾತ್ಮನಿ ಸಂಸ್ಥಿತಮ್ |

ಸ್ವಮಾಯಾವೈಭವಾನ್ ಸರ್ವಾನ್ ಸಂಹೃತ್ಯ ಸ್ವಾತ್ಮನಿ ಸ್ಥಿತಃ || ೨೨ ||

ಪಞ್ಚಬ್ರಹ್ಮಾತ್ಮಕಾತೀತೋ ಭಾಸತೇ ಸ್ವಸ್ವತೇಜಸಾ |

ಆದಾವಂತೇ ಚ ಮಧ್ಯೇ ಚ ಭಾಸತೇ ನಾನ್ಯಹೇತುನಾ || ೨೩ ||

ಮಾಯಯಾ ಮೋಹಿತಾಃ ಶಂಭೋರ್ಮಹಾದೇವಂ ಜಗದ್ಗುರುಮ್ |

ನ ಜಾನಂತಿ ಸುರಾಃ ಸರ್ವೇ ಸರ್ವಕಾರಣಕಾರಣಮ್ |

ನ ಸಂದೃಶೇ ತಿಷ್ಠತಿ ರೂಪಮಸ್ಯ ಪರಾತ್ಪರಂ ಪುರುಷಂ ವಿಶ್ವಧಾಮ || ೨೪ ||

ಯೇನ ಪ್ರಕಾಶತೇ ವಿಶ್ವಂ ಯತ್ರೈವ ಪ್ರವಿಲೀಯತೇ |

ತದ್ಬ್ರಹ್ಮ ಪರಮಂ ಶಾಂತಂ ತದ್ಬ್ರಹ್ಮಾಸ್ಮಿ ಪರಂ ಪದಮ್ || ೨೫ ||

ಪಞ್ಚಬ್ರಹ್ಮಮಿದಂ ವಿದ್ಯಾತ್ ಸದ್ಯೋಜಾತಾದಿಪೂರ್ವಕಮ್ |

ದೃಶ್ಯತೇ ಶ್ರೂಯತೇ ಯಚ್ಚ ಪಞ್ಚಬ್ರಹ್ಮಾತ್ಮಕಂ ಸ್ವಯಮ್ || ೨೬ ||

ಪಞ್ಚಧಾ ವರ್ತಮಾನಂ ತಂ ಬ್ರಹ್ಮಕಾರ್ಯಮಿತಿ ಸ್ಮೃತಮ್ |

ಬ್ರಹ್ಮಕಾರ್ಯಮಿತಿ ಜ್ಞಾತ್ವಾ ಈಶಾನಂ ಪ್ರತಿಪದ್ಯತೇ || ೨೭ ||

ಪಞ್ಚಬ್ರಹ್ಮಾತ್ಮಕಂ ಸರ್ವಂ ಸ್ವಾತ್ಮನಿ ಪ್ರವಿಲಾಪ್ಯ ಚ |

ಸೋಽಹಮಸ್ಮೀತಿ ಜಾನೀಯಾದ್ವಿದ್ವಾನ್ ಬ್ರಹ್ಮಾಽಮೃತೋ ಭವೇತ್ || ೨೮ ||

ಇತ್ಯೇತದ್ಬ್ರಹ್ಮ ಜಾನೀಯಾದ್ಯಃ ಸ ಮುಕ್ತೋ ನ ಸಂಶಯಃ || ೨೯ ||

ಪಞ್ಚಾಕ್ಷರಮಯಂ ಶಂಭುಂ ಪರಬ್ರಹ್ಮಸ್ವರೂಪಿಣಮ್ |

ನಕಾರಾದಿಯಕಾರಾಂತಂ ಜ್ಞಾತ್ವಾ ಪಞ್ಚಾಕ್ಷರಂ ಜಪೇತ್ || ೩೦ ||

ಸರ್ವಂ ಪಞ್ಚಾತ್ಮಕಂ ವಿದ್ಯಾತ್ ಪಞ್ಚಬ್ರಹ್ಮಾತ್ಮತತ್ತ್ವತಃ || ೩೧ ||

ಪಞ್ಚಬ್ರಹ್ಮಾತ್ಮಿಕೀಂ ವಿದ್ಯಾಂ ಯೋಽಧೀತೇ ಭಕ್ತಿಭಾವಿತಃ |

ಸ ಪಞ್ಚಾತ್ಮಕತಾಮೇತ್ಯ ಭಾಸತೇ ಪಞ್ಚಧಾ ಸ್ವಯಮ್ || ೩೨ ||

ಏವಮುಕ್ತ್ವಾ ಮಹಾದೇವೋ ಗಾಲವಸ್ಯ ಮಹಾತ್ಮನಃ |

ಕೃಪಾಂ ಚಕಾರ ತತ್ರೈವ ಸ್ವಾಂತರ್ಧಿಮಗಮತ್ ಸ್ವಯಮ್ || ೩೩ ||

ಯಸ್ಯ ಶ್ರವಣಮಾತ್ರೇಣಾಶ್ರುತಮೇವ ಶ್ರುತಂ ಭವೇತ್ |

ಅಮತಂ ಚ ಮತಂ ಜ್ಞಾತಮವಿಜ್ಞಾತಂ ಚ ಶಾಕಲ || ೩೪ ||

ಏಕೇನೈವ ತು ಪಿಂಡೇನ ಮೃತ್ತಿಕಾಯಾಶ್ಚ ಗೌತಮ |

ವಿಜ್ಞಾತಂ ಮೃಣ್ಮಯಂ ಸರ್ವಂ ಮೃದಭಿಂನಂ ಹಿ ಕಾರ್ಯಕಮ್ || ೩೫ ||

ಏಕೇನ ಲೋಹಮಣಿನಾ ಸರ್ವಂ ಲೋಹಮಯಂ ಯಥಾ |

ವಿಜ್ಞಾತಂ ಸ್ಯಾದಥೈಕೇನ ನಖಾನಾಂ ಕೃಂತನೇನ ಚ || ೩೬ ||

ಸರ್ವಂ ಕಾರ್ಷ್ಣಾಯಸಂ ಜ್ಞಾತಂ ತದಭಿಂನಂ ಸ್ವಭಾವತಃ |

ಕಾರಣಾಭಿಂನರೂಪೇಣ ಕಾರ್ಯಂ ಕಾರಣಮೇವ ಹಿ || ೩೭ ||

ತದ್ರೂಪೇಣ ಸದಾ ಸತ್ಯಂ ಭೇದೇನೋಕ್ತಿರ್ಮೃಷಾ ಖಲು |

ತಚ್ಚ ಕಾರಣಮೇಕಂ ಹಿ ನ ಭಿಂನಂ ನೋಭಯಾತ್ಮಕಮ್ || ೩೮ ||

ಭೇದಃ ಸರ್ವತ್ರ ಮಿಥ್ಯೈವ ಧರ್ಮಾದೇರನಿರೂಪಣಾತ್ |

ಅತಶ್ಚ ಕಾರಣಂ ನಿತ್ಯಮೇಕಮೇವಾದ್ವಯಂ ಖಲು |

ಅತ್ರ ಕಾರಣಮದ್ವೈತಂ ಶುದ್ಧಚೈತನ್ಯಮೇವ ಹಿ || ೩೯ ||

ಅಸ್ಮಿನ್ ಬ್ರಹ್ಮಪುರೇ ವೇಶ್ಮ ದಹರಂ ಯದಿದಂ ಮುನೇ |

ಪುಂಡರೀಕಂ ತು ತನ್ಮಧ್ಯೇ ಆಕಾಶೋ ದಹರೋಽಸ್ತಿ ತತ್ |

ಸ ಶಿವಃ ಸಚ್ಚಿದಾನಂದಃ ಸೋಽನ್ವೇಷ್ಟವ್ಯೋ ಮುಮುಕ್ಷಿಭಿಃ || ೪೦ ||

ಅಯಂ ಹೃದಿ ಸ್ಥಿತಃ ಸಾಕ್ಷೀ ಸರ್ವೇಷಾಮವಿಶೇಷತಃ |

ತೇನಾಯಂ ಹೃದಯಂ ಪ್ರೋಕ್ತಃ ಶಿವಃ ಸಂಸಾರಮೋಚಕಃ |

ಇತ್ಯುಪನಿಷತ್ || ೪೧ ||

ಓಂ ಸಹ ನಾವವತು |

ಸಹ ನೌ ಭುನಕ್ತು