ಶ್ರೀ ಸೂರ್ಯ ಸ್ತುತಿಃ (ಮನು ಕೃತಂ)

ಮನುರುವಾಚ |

ನಮೋ ನಮೋ ವರೇಣ್ಯಾಯ ವರದಾಯಾಽಂಶುಮಾಲಿನೇ |

ಜ್ಯೋತಿರ್ಮಯ ನಮಸ್ತುಭ್ಯಮನಂತಾಯಾಜಿತಾಯ ತೇ || ೧ ||

ತ್ರಿಲೋಕಚಕ್ಷುಷೇ ತುಭ್ಯಂ ತ್ರಿಗುಣಾಯಾಮೃತಾಯ ಚ |

ನಮೋ ಧರ್ಮಾಯ ಹಂಸಾಯ ಜಗಜ್ಜನನಹೇತವೇ || ೨ ||

ನರನಾರೀಶರರೀರಾಯ ನಮೋ ಮೀಢುಷ್ಟಮಾಯ ತೇ |

ಪ್ರಜ್ಞಾನಾಯಾಖಿಲೇಶಾಯ ಸಪ್ತಾಶ್ವಾಯ ತ್ರಿಮೂರ್ತಯೇ || ೩ ||

ನಮೋ ವ್ಯಾಹೃತಿರೂಪಾಯ ತ್ರಿಲಕ್ಷಾಯಾಽಽಶುಗಾಮಿನೇ |

ಹರ್ಯಶ್ವಾಯ ನಮಸ್ತುಭ್ಯಂ ನಮೋ ಹರಿತವಾಹವೇ || ೪ ||

ಏಕಲಕ್ಷವಿಲಕ್ಷಾಯ ಬಹುಲಕ್ಷಾಯ ದಂಡಿನೇ |

ಏಕಸಂಸ್ಥದ್ವಿಸಂಸ್ಥಾಯ ಬಹುಸಂಸ್ಥಾಯ ತೇ ನಮಃ || ೫ ||

ಶಕ್ತಿತ್ರಯಾಯ ಶುಕ್ಲಾಯ ರವಯೇ ಪರಮೇಷ್ಠಿನೇ |

ತ್ವಂ ಶಿವಸ್ತ್ವಂ ಹರಿರ್ದೇವ ತ್ವಂ ಬ್ರಹ್ಮಾ ತ್ವಂ ದಿವಸ್ಪತಿಃ || ೬ ||

ತ್ವಮೋಂಕಾರೋ ವಷಟ್ಕಾರಃ ಸ್ವಧಾ ಸ್ವಾಹಾ ತ್ವಮೇವ ಹಿ |

ತ್ವಾಮೃತೇ ಪರಮಾತ್ಮಾನಂ ನ ತತ್ಪಶ್ಯಾಮಿ ದೈವತಮ್ || ೭ ||