ಬಿಲ್ವೋಪನಿಷತ್

ಅಥ ವಾಮದೇವಃ ಪರಮೇಶ್ವರಂ ಸೃಷ್ಟಿಸ್ಥಿತಿಲಯಕಾರಣಮುಮಾಸಹಿತಂ ಸ್ವಶಿರಸಾ ಪ್ರಣಮ್ಯೇತಿ ಹೋವಾಚ |

ಅಧೀಹಿ ಭಗವನ್ ಸರ್ವವಿದ್ಯಾಂ ಸರ್ವರಹಸ್ಯವರಿಷ್ಠಾಂ ಸದಾ ಸದ್ಭಿಃ ಪೂಜ್ಯಮಾನಾ ನಿಗೂಢಾಮ್

ನ ವಕ್ತವ್ಯಂ ನ ವಕ್ತವ್ಯಂ ನ ವಕ್ತವ್ಯಂ ಕದಾಚನ |

ಮತ್ಸ್ವರೂಪಸ್ತ್ವಯಂ ಜ್ಞೇಯೋ ಬಿಲ್ವವೃಕ್ಷೋ ವಿಧಾನತಃ |

ಏಕೇನ ಬಿಲ್ವಪತ್ರೇಣ ಸಂತುಷ್ಟೋಽಸ್ಮಿ ಮಹಾಮುನೇ |

ಇತಿ ಬ್ರುವಂತಂ ಪರಮೇಶ್ವರಂ ಪುನಃ ಪ್ರಣಮ್ಯೇತಿ ಹೋವಾಚ |

ಭಗವನ್ ಸರ್ವಲೋಕೇಶ ಸತ್ಯಜ್ಞಾನಾದಿಲಕ್ಷಣ |

ಕಥಂ ಪೂಜಾ ಪ್ರಕರ್ತವ್ಯಾ ತಾಂ ವದಸ್ವ ದಯಾನಿಧೇ |

ಇತಿ ಪುನಃ ಪೃಚ್ಛಂತಂ ವಾಮದೇವಮಾಲಿಙ್ಗ್ಯೇತಿ ಹೋವಾಚ |

ಬುದ್ಧಿಮಾಂಸ್ತ್ವಮಿತಿ ಜ್ಞಾತ್ವಾ ವಕ್ಷ್ಯಾಮಿ ಮುನಿಸತ್ತಮ |

ಮಮ ಪ್ರಿಯೇಣ ಬಿಲ್ವೇನ ತ್ವಂ ಕುರುಷ್ವ ಮದರ್ಚನಮ್ |

ದ್ರವ್ಯಾಣಾಮುತ್ತಮೈರ್ಲೋಕೇ ಮಮ ಪೂಜಾವಿಧೌ ತವ |

ಪತ್ರಪುಷ್ಪಾಕ್ಷತೈರ್ದಿವ್ಯೈರ್ಬಿಲ್ವಪತ್ರೈಃ ಸಮರ್ಚಯ |

ಬಿಲ್ವಪತ್ರಂ ವಿನಾ ಪೂಜಾ ವ್ಯರ್ಥಾ ಭವತಿ ಸರ್ವದಾ |

ಮಮ ರೂಪಮಿತಿ ಜ್ಞೇಯಂ ಸರ್ವರೂಪಂ ತದೇವ ಹಿ |

ಪ್ರಾತಃ ಸ್ನಾತ್ವಾ ವಿಧಾನೇನ ಸಂಧ್ಯಾಕರ್ಮ ಸಮಾಪ್ಯ ಚ |

ಭೂತಿರುದ್ರಾಕ್ಷಭರಣ ಉದೀಚೀಂ ದಿಶಮಾಶ್ರಯೇತ್ |

ಸದ್ಯೋಜಾತಾದಿಭಿರ್ಮಂತ್ರೈರ್ನಮಸ್ಕೃತ್ಯ ಪುನಃ ಪುನಃ |

ಪ್ರದಕ್ಷಿಣತ್ರಯಂ ಕೃತ್ವಾ ಶಿವರೂಪಮಿತಿ ಸ್ಫುಟಮ್ |

ದೇವೀಂ ಧ್ಯಾಯೇತ್ತಥಾ ವೃಕ್ಷೇ ವಿಷ್ಣುರೂಪಂ ಚ ಸರ್ವದಾ |

ಬ್ರಹ್ಮರೂಪಂ ಚ ವಿಜ್ಞೇಯಂ ಸರ್ವರೂಪಂ ವಿಭಾವಯೇತ್ |

ವಾಮದಕ್ಷಿಣಮಧ್ಯಸ್ಥಂ ಬ್ರಹ್ಮವಿಷ್ಣುಶಿವಾತ್ಮಕಮ್ |

ಇಂದ್ರಾದಯಶ್ಚ ಯಕ್ಷಾಂತಾ ವೃಂತಭಾಗೇ ವ್ಯವಸ್ಥಿತಾಃ |

ಪೃಷ್ಠಭಾಗೇಽಮೃತಂ ಯಸ್ಮಾದರ್ಚಯೇನ್ಮಮ ತುಷ್ಟಯೇ |

ಉತ್ತಾನಬಿಲ್ವಪತ್ರಂ ಚ ಯಃ ಕುರ್ಯಾನ್ಮಮ ಮಸ್ತಕೇ |

ಮಮ ಸಾಯುಜ್ಯಮಾಪ್ನೋತಿ ನಾತ್ರ ಕಾರ್ಯಾ ವಿಚಾರಣಾ |

ತ್ರಿಮೂರ್ತಿಸ್ತ್ರಿಗುಣಂ ಬೈಲ್ವಮಗ್ನಿರೂಪಂ ತಥೈವ ಚ |

ಬ್ರಹ್ಮರೂಪಂ ಕಲಾರೂಪಂ ವೇದರೂಪಂ ಮಹಾಮುನೇ |

ಪುರಾತನೋಽಹಂ ಪುರುಷೋಽಹಮೀಶೋ ಹಿರಣ್ಮಯೋಽಹಂ ಶಿವರೂಪಮಸ್ಮಿ |

ಸಬಿಲ್ವರೂಪಂ ಸಗುಣಾತ್ಮರೂಪಂ ತ್ರಿಮೂರ್ತಿರೂಪಂ ಶಿವರೂಪಮಸ್ಮಿ |

ಪೃಷ್ಠಭಾಗೇಽಮೃತಂ ನ್ಯಸ್ತಂ ದೇವೈರ್ಬ್ರಹ್ಮಾದಿಭಿಃ ಪುರಾ |

ಉತ್ತಾನಬಿಲ್ವಪತ್ರೇಣ ಪೂಜಯೇತ್ ಸರ್ವಸಿದ್ಧಯೇ |

ತಸ್ಮಾತ್ ಸರ್ವಪ್ರಯತ್ನೇನ ಬಿಲ್ವಪತ್ರೈಃ ಸದಾರ್ಚಯ |

ಬಿಲ್ವಪತ್ರಂ ವಿನಾ ವಸ್ತು ನಾಸ್ತಿ ಕಿಞ್ಚಿತ್ತವಾನಘ |

ತಸ್ಮಾತ್ ಸರ್ವಪ್ರಯತ್ನೇನ ಬಿಲ್ವಪತ್ರೈಃ ಸದಾರ್ಚಯ |

ಉತ್ತಾನಪತ್ರಪೂಜಾಂ ಚ ಯಃ ಕುರ್ಯಾನ್ಮಮ ಮಸ್ತಕೇ |

ಇಹ ಲೋಕೇಽಖಿಲಂ ಸೌಖ್ಯಂ ಪ್ರಾಪ್ನೋತ್ಯಂತೇ ಪುರೇ ಮಮ |

ತಿಷ್ಠತ್ಯೇವ ಮಹಾವೀರಃ ಪುನರ್ಜನ್ಮವಿವರ್ಜಿತಃ |

ಸೋದಕೈರ್ಬಿಲ್ವಪತ್ರೈಶ್ಚ ಯಃ ಕುರ್ಯಾನ್ಮಮ ಪೂಜನಮ್ |

ಮಮ ಸಾಂನಿಧ್ಯಮಾಪ್ನೋತಿ ಪ್ರಮಥೈಃ ಸಹ ಮೋದತೇ |

ಸತ್ಯಂ ಸತ್ಯಂ ಪುನಃ ಸತ್ಯಮುದ್ಧೃತ್ಯ ಭುಜಮುಚ್ಯತೇ |

ಬಿಲ್ವಪೂಜನತೋ ಲೋಕೇ ಮತ್ಪೂಜಾಯಾಃ ಪರಾ ನ ಹಿ |

ತ್ರಿಸುಪರ್ಣಂ ತ್ರಿಋಚಾಂ ರೂಪಂ ತ್ರಿಸುಪರ್ಣಂ ತ್ರಯೀಮಯಮ್ |

ತ್ರಿಗುಣಂ ತ್ರಿಜಗನ್ಮೂರ್ತಿತ್ರಯಂ ಶಕ್ತಿತ್ರಯಂ ತ್ರಿದೃಕ್ |

ಕಾಲತ್ರಯಂ ಚ ಸವನತ್ರಯಂ ಲಿಙ್ಗತ್ರಯಂ ತ್ರಿಪಾತ್ |

ತೇಜಸ್ತ್ರಯಮಕಾರೋಕಾರಮಕಾರಪ್ರಣವಾತ್ಮಕಮ್ |

ದೇವೇಷು ಬ್ರಾಹ್ಮಣೋಽಹಂ ಹಿ ತ್ರಿಸುಪರ್ಣಮಯಾಚಿತಮ್ |

ಮಹ್ಯಂ ವೈ ಬ್ರಾಹ್ಮಣಾಯೇದಂ ಮಯಾ ವಿಜ್ಞಪ್ತಕಾಮಿಕಮ್ |

ದದ್ಯಾದ್ಬ್ರಹ್ಮಭ್ರೂಣವೀರಹತ್ಯಾಯಾಶ್ಚಾನ್ಯಪಾತಕೈಃ |

ಮುಕ್ತೋಽಖಂಡಾನಂದಬೋಧೋ ಬ್ರಹ್ಮಭೂಯಾಯ ಕಲ್ಪತೇ |

ತ್ರಿಸುಪರ್ಣೋಪನಿಷದಃ ಪಠನಾತ್ಪಙ್ಕ್ತಿಪಾವನಃ |

ಬೋಧಕೋ ಹ್ಯಾ ಸಹಸ್ರಾದ್ವೈ ಪಙ್ಕ್ತಿಂ ಪಾವಯತೇ ಧ್ರುವಮ್ |

ತ್ರಿಸುಪರ್ಣಶ್ರುತಿರ್ಹ್ಯೇಷಾ ನಿಷ್ಕೃತೌ ತ್ರಿದಲೇ ರತಾ |

ಶ್ರದ್ಧತ್ಸ್ವ ವಿದ್ವಂನಾದ್ಯಂ ತದಿತಿ ವೇದಾನುಶಾಸನಮ್ |

ಅಖಂಡಾನಂದಸಂಬೋಧಮಯೋ ಯಸ್ಮಾದಹಂ ಮುನೇ |

ವಿನ್ಯಸ್ತಾಮೃತಭಾಗೇನ ಸುಪರ್ಣೇನಾವಕುಂಠಯ |

ಅಮೃತಂ ಮೋಕ್ಷವಾಚಂತು ತೇನಾಸ್ಮದವಕುಂಠನಾತ್ |

ಪ್ರಾಪ್ಯೇತೇ ಭೋಗಮೋಕ್ಷೌ ಹಿ ಸ್ಥಿತ್ಯಂತೇ ಮದನುಗ್ರಹಾತ್ |

ಉತ್ತಾನಭಾಗಪರ್ಣೇನ ಮೂರ್ಧ್ನಿ ಮೇ ನ್ಯುಬ್ಜಮರ್ಪಯೇತ್ |

ಮೋಕ್ಷೇಽಮೃತಾವಕುಂಠೋಽಹಂ ಭವೇಯಂ ತವ ಕಾಮಧುಕ್ |

ಯೇನ ಕೇನ ಪ್ರಕಾರೇಣ ಬಿಲ್ವಕೇನಾಪಿ ಮಾಂ ಯಜ |

ತೀರ್ಥದಾನತಪೋಯೋಗಸ್ವಾಧ್ಯಾಯಾ ನೈವ ತತ್ಸಮಾಃ |

ಬಿಲ್ವಂ ವಿಧಾನತಃ ಸ್ಥಾಪ್ಯ ವರ್ಧಯಿತ್ವಾ ಚ ತದ್ದಲೈಃ |

ಯಃ ಪೂಜಯತಿ ಮಾಂ ಭಕ್ತ್ಯಾ ಸೋಽಹಮೇವ ನ ಸಂಶಯಃ |

ಯ ಏತದಧೀತೇ ಬ್ರಹ್ಮಹಾಽಬ್ರಹ್ಮಹಾ ಭವತಿ |

ಸ್ವರ್ಣಸ್ತೇಯ್ಯಸ್ತೇಯೀ ಭವತಿ