ಭಾವನೋಪನಿಷತ್

ಸ್ವಾವಿದ್ಯಾಪದತತ್ಕಾರ್ಯಂ ಶ್ರೀಚಕ್ರೋಪರಿ ಭಾಸುರಮ್ |

ಬಿಂದುರೂಪಶಿವಾಕಾರಂ ರಾಮಚಂದ್ರಪದಂ ಭಜೇ |

ಓಂ ಭದ್ರಂ ಕರ್ಣೇಭಿಃ ಶೃಣುಯಾಮ ದೇವಾ |

ಭದ್ರಂ ಪಶ್ಯೇಮಾಕ್ಷಭಿರ್ಯಜತ್ರಾಃ

ಓಂ ಆತ್ಮಾನಮಖಂಡಮಂಡಲಾಕಾರಮಾವೃತ್ಯ ಸಕಲಬ್ರಹ್ಮಾಂಡಮಂಡಲಂ ಸ್ವಪ್ರಕಾಶಂ ಧ್ಯಾಯೇತ್ |

ಶ್ರೀಗುರುಃ ಸರ್ವಕಾರಣಭೂತಾ ಶಕ್ತಿಃ |

ತೇನ ನವರಂಧ್ರರೂಪೋ ದೇಹಃ |

ನವಶಕ್ತಿರೂಪಗ್ಂ ಶ್ರೀಚಕ್ರಮ್ |

ವಾರಾಹೀ ಪಿತೃರೂಪಾ ಕುರುಕುಲ್ಲಾ ಬಲಿದೇವತಾ ಮಾತಾ |

ಪುರುಷಾರ್ಥಾಃ ಸಾಗರಾಃ || ೧ ||

ದೇಹೋ ನವರತ್ನದ್ವೀಪಃ |

ತ್ವಗಾದಿಸಪ್ತಧಾತುಭಿರನೇಕೈಃ ಸಂಯುಕ್ತಾಃ |

ಸಂಕಲ್ಪಾಃ ಕಲ್ಪತರವಃ |

ತೇಜಃ ಕಲ್ಪಕೋದ್ಯಾನಮ್ |

ರಸನಯಾ ಭಾವ್ಯಮಾನಾ ಮಧುರಾಮ್ಲತಿಕ್ತಕಟುಕಷಾಯಲವಣರಸಾಃ ಷಡೃತವಃ |

ಕ್ರಿಯಾಶಕ್ತಿಃ ಪೀಠಮ್ |

ಕುಂಡಲಿನೀ ಜ್ಞಾನಶಕ್ತಿರ್ಗೃಹಮ್ |

ಇಚ್ಛಾಶಕ್ತಿರ್ಮಹಾತ್ರಿಪುರಸುಂದರೀ |

ಜ್ಞಾತಾ ಹೋತಾ ಜ್ಞಾನಮಗ್ನಿಃ ಜ್ಞೇಯಗ್ಂ ಹವಿಃ |

ಜ್ಞಾತೃಜ್ಞಾನಜ್ಞೇಯಾ ನಾಮಭೇದ ಭಾವನಗ್ಂ ಶ್ರೀಚಕ್ರಪೂಜನಮ್ |

ನಿಯತಿ ಸಹಿತ ಶೃಙ್ಗಾರಾದಯೋ ನವರಸಾ ಅಣಿಮಾದಯಃ |

ಕಾಮ ಕ್ರೋಧ ಲೋಭ ಮೋಹ ಮದ ಮಾತ್ಸರ್ಯ ಪುಣ್ಯ ಪಾಪಮಯಾ ಬ್ರಾಹ್ಮ್ಯಾದ್ಯಷ್ಟಶಕ್ತಯಃ || ೨ ||

ಆಧಾರನವಕಂ ಮುದ್ರಾ ಶಕ್ತಯಃ |

ಪೃಥಿವ್ಯಪ್ತೇಜೋವಾಯ್ವಾಕಾಶ ಶ್ರೋತ್ರತ್ವಕ್ಚಕ್ಷುರ್ಜಿಹ್ವಾಘ್ರಾಣ ವಾಕ್ಪಾಣಿಪಾದಪಾಯೂಪಸ್ಥ ಮನೋವಿಕಾರಾಃ ಷೋಡಶ ಶಕ್ತಯಃ |

ವಚನಾದಾನಗಮನವಿಸರ್ಗಾನಂದ ಹಾನೋಪಾದಾನೋಪೇಕ್ಷಾ ಬುದ್ಧಯೋಽನಙ್ಗಕುಸುಮಾದಿ ಶಕ್ತಯೋಽಷ್ಟೌ |

ಅಲಂಬುಸಾ ಕುಹೂರ್ವಿಶ್ವೋದರೀ ವರುಣಾ ಹಸ್ತಿಜಿಹ್ವಾ ಯಶೋವತ್ಯಶ್ವಿನೀ ಗಾಂಧಾರೀ ಪೂಷಾ ಶಙ್ಖಿನೀ ಸರಸ್ವತೀಡಾ ಪಿಙ್ಗಲಾ ಸುಷುಮ್ನಾ ಚೇತಿ ಚತುರ್ದಶ ನಾಡ್ಯಃ |

ಸರ್ವಸಂಕ್ಷೋಭಿಣ್ಯಾದಿಚತುರ್ದಶಾರಗಾ ದೇವತಾಃ |

ಪ್ರಾಣಾಪಾನ ವ್ಯಾನೋದಾನ ಸಮಾನ ನಾಗ ಕೂರ್ಮ ಕೃಕರ ದೇವದತ್ತ ಧನಂಜಯಾ ಇತಿ ದಶ ವಾಯವಃ |

ಸರ್ವಸಿದ್ಧಿಪ್ರದಾದಿ ದೇವ್ಯೋ ಬಹಿರ್ದಶಾರಗಾ ದೇವತಾಃ || ೩ ||

ಏತದ್ವಾಯುದಶಕ ಸಂಸರ್ಗೋಪಾಧಿಭೇಧೇನ ರೇಚಕಪೂರಕಶೋಷಕದಾಹಕಪ್ಲಾವಕಾ ಅಮೃತಮಿತಿ ಪ್ರಾಣಮುಖ್ಯತ್ವೇನ ಪಞ್ಚವಿಧೋ ಜಠರಾಗ್ನಿರ್ಭವತಿ |

ಕ್ಷಾರಕೋದ್ಗಾರಕಃ ಕ್ಷೋಭಕೋ ಮೋಹಕೋ ಜೃಂಭಕ ಇತ್ಯಪಾನಮುಖ್ಯತ್ವೇನ ಪಞ್ಚವಿಧೋಽಸ್ತಿ |

ತೇನ ಮನುಷ್ಯಾಣಾಂ ಮೋಹಕೋ ದಾಹಕೋ ಭಕ್ಷ್ಯ ಭೋಜ್ಯ ಲೇಹ್ಯ ಚೋಷ್ಯ ಪೇಯಾತ್ಮಕಂ ಚತುರ್ವಿಧಮಂನಂ ಪಾಚಯತಿ |

ಏತಾ ದಶ ವಹ್ನಿಕಲಾಃ ಸರ್ವಜ್ಞತ್ವಾದ್ಯಂತರ್ದಶಾರಗಾ ದೇವತಾಃ |

ಶೀತೋಷ್ಣ ಸುಖದುಃಖೇಚ್ಛಾ ಸತ್ತ್ವರಜಸ್ತಮೋಗುಣಾ ವಶಿನ್ಯಾದಿಶಕ್ತಯೋಽಷ್ಟೌ || ೪ ||

ಶಬ್ದಸ್ಪರ್ಶರೂಪರಸಗಂಧಾಃ ಪಞ್ಚತನ್ಮಾತ್ರಾಃ ಪಞ್ಚಪುಷ್ಪಬಾಣಾ |

ಮನ ಇಕ್ಷುಧನುಃ |

ವಶ್ಯೋ ಬಾಣೋ |

ರಾಗಃ ಪಾಶೋ |

ದ್ವೇಷೋಽಙ್ಕುಶಃ |

ಅವ್ಯಕ್ತಮಹತ್ತತ್ತ್ವಮಹಙ್ಕಾರಾಃ ಕಾಮೇಶ್ವರೀ ವಜ್ರೇಶ್ವರೀ ಭಗಮಾಲಿನ್ಯೋಽಂತಸ್ತ್ರಿಕೋಣಾಗ್ರಗಾ ದೇವತಾಃ |

ಪಞ್ಚದಶ ತಿಥಿರೂಪೇಣ ಕಾಲಸ್ಯ ಪರಿಣಾಮಾವಲೋಕನಸ್ಥಿತಿಃ ಪಞ್ಚದಶನಿತ್ಯಾಃ |

ಶ್ರದ್ಧಾನುರೂಪಾ ಧೀರ್ದೇವತಾ |

ತಯೋಃ ಕಾಮೇಶ್ವರೀ ಸದಾನಂದ ಘನಾ ಪರಿಪೂರ್ಣ ಸ್ವಾತ್ಮೈಕ್ಯರೂಪಾ ದೇವತಾ ಲಲಿತಾ || ೫ ||

ಸಲಿಲಮಿತಿ ಸೌಹಿತ್ಯಕರಣಗ್ಂ ಸತ್ತ್ವಮ್ |

ಕರ್ತವ್ಯಮಕರ್ತವ್ಯಮಿತಿ ಭಾವನಾಯುಕ್ತ ಉಪಚಾರಃ |

ಅಸ್ತಿ ನಾಸ್ತೀತಿ ಕರ್ತವ್ಯತಾನೂಪಚಾರಃ |

ಬಾಹ್ಯಾಭ್ಯಂತಃಕರಣಾನಾಂ ರೂಪಗ್ರಹಣ ಯೋಗ್ಯತಾ ಸ್ತ್ವಿತ್ಯಾವಾಹನಮ್ |

ತಸ್ಯ ಬಾಹ್ಯಾಭ್ಯಂತಃಕರಣಾನಾಂ ಏಕರೂಪವಿಷಯಗ್ರಹಣಮಾಸನಮ್ |

ರಕ್ತಶುಕ್ಲಪದೈಕೀಕರಣಂ ಪಾದ್ಯಮ್ |

ಉಜ್ಜ್ವಲದಾಮೋದಾನಂದಾಸನ ದಾನಮರ್ಘ್ಯಮ್ |

ಸ್ವಚ್ಛಂ ಸ್ವತಃಸಿದ್ಧಮಿತ್ಯಾಚಮನೀಯಮ್ |

ಚಿಚ್ಚಂದ್ರಮಯೀತಿ ಸರ್ವಾಙ್ಗಸ್ರವಣಗ್ಂ ಸ್ನಾನಮ್ |

ಚಿದಗ್ನಿಸ್ವರೂಪ ಪರಮಾನಂದ ಶಕ್ತಿಸ್ಫುರಣಂ ವಸ್ತ್ರಮ್ |

ಪ್ರತ್ಯೇಕಗ್ಂ ಸಪ್ತವಿಂಶತಿಧಾ ಭಿಂನತ್ವೇನೇಚ್ಛಾ ಜ್ಞಾನ ಕ್ರಿಯಾತ್ಮಕ ಬ್ರಹ್ಮಗ್ರಂಥಿ ಮದ್ರಸ ತಂತು ಬ್ರಹ್ಮನಾಡೀ ಬ್ರಹ್ಮಸೂತ್ರಮ್ |

ಸ್ವ ವ್ಯತಿರಿಕ್ತ ವಸ್ತು ಸಙ್ಗರಹಿತ ಸ್ಮರಣಂ ವಿಭೂಷಣಮ್ |

ಸತ್ಸಂಗ ಪರಿಪೂರ್ಣತಾನುಸ್ಮರಣಂ ಗಂಧಃ |

ಸಮಸ್ತವಿಷಯಾಣಾಂ ಮನಸಃ ಸ್ಥೈರ್ಯೇಣಾನುಸಂಧಾನಂ ಕುಸುಮಮ್ || ೬ ||

ತೇಷಾಮೇವ ಸರ್ವದಾ ಸ್ವೀಕರಣಂ ಧೂಪಃ |

ಪವನಾವಚ್ಛಿಂನೋರ್ಧ್ವ ಜ್ವಲನಸಚ್ಚಿದುಲ್ಕಾಕಾಶ ದೇಹೋ ದೀಪಃ |

ಸಮಸ್ತ ಯಾತಾಯಾತವರ್ಜನಂ ನೈವೇದ್ಯಮ್ |

ಅವಸ್ಥಾತ್ರಯಾಣಾಮೇಕೀಕರಣಂ ತಾಂಬೂಲಮ್ |

ಮೂಲಾಧಾರಾದಾಬ್ರಹ್ಮರಂಧ್ರಪರ್ಯಂತಂ ಬ್ರಹ್ಮರಂಧ್ರಾದಾಮೂಲಾಧಾರಪರ್ಯಂತಂ ಗತಾಗತರೂಪೇಣ ಪ್ರಾದಕ್ಷಿಣ್ಯಮ್ |

ತುರೀಯಾವಸ್ಥಾ ನಮಸ್ಕಾರಃ |

ದೇಹಶೂನ್ಯ ಪ್ರಮಾತೃತಾ ನಿಮಜ್ಜನಂ ಬಲಿಹರಣಮ್ |

ಸತ್ಯಮಸ್ತಿ ಕರ್ತವ್ಯಮಕರ್ತವ್ಯಮೌದಾಸೀನ್ಯ ನಿತ್ಯಾತ್ಮವಿಲಾಪನಗ್ಂ ಹೋಮಃ |

ಸ್ವಯಂ ತತ್ಪಾದುಕಾನಿಮಜ್ಜನಂ ಪರಿಪೂರ್ಣಧ್ಯಾನಮ್ || ೭ ||

ಏವಂ ಮುಹೂರ್ತತ್ರಯಂ ಭಾವನಯಾ ಯುಕ್ತೋ ಭವತಿ ತಸ್ಯ ದೇವತಾತ್ಮೈಕ್ಯ ಸಿದ್ಧಿಃ |

ಚಿಂತಿತ ಕಾರ್ಯಾಣಿ ಅಯತ್ನೇನ ಸಿದ್ಧ್ಯಂತಿ |

ಸ ಏವ ಶಿವಯೋಗೀತಿ ಕಥ್ಯತೇ |

ಕಾದಿ ಹಾದಿ ಮತೋಕ್ತೇನ ಭಾವನಾ ಪ್ರತಿಪಾದಿತಾ ಜೀವನ್ಮುಕ್ತೋ ಭವತಿ |

ಯ ಏವಂ ವೇದ |

ಇತ್ಯುಪನಿಷತ್ || ೮ ||

ಓಂ ಭದ್ರಂ ಕರ್ಣೇಭಿಃ ಶೃಣುಯಾಮ ದೇವಾ |

ಭದ್ರಂ ಪಶ್ಯೇಮಾಕ್ಷಭಿರ್ಯಜತ್ರಾಃ